|
ŞEYX SƏNAN
Şeyx Nəim Nasıl?
Şeyx Mərvan Tuhaf bir sirr, O da bambaşqa bir rəzalətdir.
Şeyx Kəbir (mırıldanmaqda olan Şeyx Mərvan ilə Şeyx Nəimə) Böylə dar ruha malik olduğunuz Heç də layiq deyil... Yetər, susunuz!
(dirsəklənib oturmaqda olan Sənana) Söylə, Sənan, nə var? Nə oldu sana?
Şeyx Sənan Möhtərəm Şeyx! Sorma, heç sorma!
Şeyx Kəbir Nərdəsin? Üç gün oldu müntəziriz, Söylə, bir söylə...
Şeyx Sənan (məhcub) A-h, əfv ediniz.
Şeyx Kəbir Yaşamaqçin hicab qorxuludur, Utananlar pək az müvəffəq olur. Bu sıxılmaqda bəncə yox məna, Hər nə var, heç çəkinmə, söylə bana.
Şeyx Sənan Çünki dəhşətli gördüyüm röya...
Şeyx Kəbir Söylə...
Şeyx Sənan Heç varmıyor dilim əsla.
Bu sırada Zəhra ilə Əzra yarı açılmış qapı arasında görünərək onları böyük bir maraq ilə dinləyib dururlar.
Şeyx Hadi (Sənana) Bu tərəddüd, inan ki, bicadır.
Şeyx Kəbir Bir həqiqət deyil bu, röyadır.
Şeyx Sənan yerindən qalxaraq röyasını söyləməyə başlar. Şeyx Kəbir onun sözlərini dinləyərək yeri gəldikcə başını təhərrüklə təsdiq və davam əlamətləri göstərir.
Şeyx Sənan Ey böyük Şeyx! Gördüm ətrafı Sarıyor incə, xoş bir aydınlıq. Gecənin sanki xəndeyi-safı Saçıyor kainata bayğınlıq. Ruhu təsxir edən gözəl məhtab, Dəmbədəm nəşr edərdi mövceyi-nur, Gəldi bir şeyx o dəm yüzündə niqab, Bəni ta gördü, oldu pək məsrur. Sanki bir tifl idim... Qucaqlayaraq Bir zaman öpdü, sevdi, hoplatdı. Sonra omzunda çox atıb tutaraq, Gah gəzdirdi, gah oynatdı. Aqibət bən o möhtərəm şeyxin Sillələr endirib də yüz-gözünə, Əylənirdim... xilas edilmək üçün, Xeyli yalvardı, baxmadım sözünə. Azacıq keçdi, şeyxi-naməlum, Bir də gördüm diyor ki: “Bax, Sənan! Bax nə müdhiş, nasıl dərin uçurum. İştə son mənzil! İştə Gürcüstan!” Baxdım eyvah, atıb da boynundan, Bəni bir an içində məhv edəcək. Bağırıb Haqdan istəyincə aman Qoşdu imdada bir ziyalı mələk...
Şeyx Kəbir Sonra?
Şeyx Sənan Ta şeyxə eylədim diqqət, Bəni titrətdi bir dərin heyrət.
Şeyx Kəbir Əcəba kimdi şeyx?
Şeyx Sənan Sorma!..
Şeyx Kəbir Neçin?
Şeyx Sənan Sən idin ah, o şeyx, əvət, sən idin.
Hər kəsdə böyük bir heyrət. Şeyx Kəbir isə mənalı bir tərzdə başını təhərrüklə bir qədər sükut ixtiyar edər.
Bəni, şeyxim, bağışla, məzurum; Çünki məğdur, həm də mənfurum.
Şeyx Mərvan (yarım səslə Nəimə) İştə gördünmü? Bax, nasıl xain!..
Şeyx Nəim (Şeyx Kəbiri göstərərək, eyni ahənglə istehzalı) Baxalım, bir nə söylüyor kahin!
Şeyx Hadi (Sənanı təsliyətlə) Bunca dəhşət, inan ki, bicadır.
Şeyx Sədra Heç təlaş istəməz, bu röyadır.
|