QARACIQ ÇOBAN
Nə xiyaldasan, Qazan? Mənə lazımdır anan! Gör neyləyərəm ona, Verrəm keşiş oğluna. Bir oğlan doğar mənə, Qırım qoyaram sənə!
Şöklü şah bunu decək, Eşidir çoban demək: – Mərə, ağılsız yağı! Usu yox, dinsiz yağı! Qarşı yatan bu dağlar Quruyub, otu bitməz, Qanlı-qanlı bu çaylar Quruyub, suyu gəlməz, Qızıl-qızıl dəvələr Qarıyıb, köşək verməz, Ağca-ağca qoyunlar Qarıyıb, quzu verməz, Köhlən atlar qarıyıb, Day verməz, qulun verməz, Qazanın anası da Qarıyıb, oğul verməz. Dölündə gözün varsa, Qaragöz qızın varsa, Gətir Qazan bəyə ver, Dölün tut xeyrini gör!
Çoban decək bu sözü Tutuldu göyün üzü, Çatdı Oğuz bəyləri, Gəldi xanın ləşkəri. Aslan yetdi, nər yetdi. Görəlim kimlər yetdi.
Arxalığı xoftanı Üç buğa dərisindən, Acığı tutan zaman Qara daşı gəmirən.
Elin qəmini görən, Mərd igidlərin başı, Bığların dalda hörən, Qazanın mərd qardaşı.
Qara nər Qaragünə Gəldi düşmən üstünə: – Qılınc çal, ağam Qazan, Gəldi, çatdı el, arxan!
Dəmirqapı Dərbəndin Dəmir qapısın alan, Atmış tutam kəndirin Ərlər boynuna salan.
Elin qəhrəman oğlu Yenilməz adlım sərdar Səlcuq oğlu, xan oğlu, Dəli nər Dəli Dondar.
Gəldi, çapar yetişdi, Vurdu qabağa keçdi: – Qılınc çal, ağam Qazan, Gəldi, çatdı el, arxan!
Hər yanda adlı-sanlı, Dəmir ox, dəmir yaylı, Əynində polad yaraq Başında dəmir papaq, Düşmənə qan qusduran, “Mərdin” qalasın alan, Qocalar təhsin edən, Şalvarı al məxmərdən, Xoşsöhbət, sözlü-sazlı, Yəhəri ağ qotazlı, Qarasaç, qarabığlı, Qaragünənin oğlu, Qazanın qızın alan Qarabudaq pəhləvan: – Qılınc çal, ağam Qazan Gəldi, çatdı el, arxan!
Dağlar əsdi, titrəşdi Dalıyca kim yetişdi?
Qaraqaş, qarabığlı, Ərənlər sərkərdəsi Qəflət Qocanın oğlu Ağ-boz atın yiyəsi.
Bir ləşkərin qarşısın Tək atlı kəsib duran, Qırx iki min qoşuna Təkinə qan qusduran.
Yaman gündə, dar gündə Çəkən elin qayğısın, Dəstursuz basıb boğan, Bayındır xan yağısın.
Əyri qılıncı kəskin Şir oğlu Şir Şəmsəddin: – Qılınc çal, ağam Qazan, Gəldi çatdı el, arxan!
Bayburdun hasarından, Daşlanıb uçub qaçan, El-obanın dayağı, Qazan xanın inağı, Yeddi qızın ümidi, Oğuzun qoç igidi, Kim gəldi, gəlsin görək. Boz ayğırlı Beyrək: – Qılınc çal, ağam Qazan, Gəldi çatdı el, arxan!
Saysan, saya salmalı, Başı ipək çalmalı, Sultanlardan bac alan, Bəyləri atdan salan,
|