QARACIQ ÇOBAN
Həsənlə Hüseynin beşiyi ağac.
Torpaq olsan, namərd dənin bitirmə! Ziyankarı boya-başa yetirmə! Barı sən gəl, ağac, haqqı itirmə, Sənə asılarsam götürmə, ağac!
Götürəcək olsan nolasan, ağac, Görüm saralasan, solasan, ağac! Doğranıb qol-budaq olasan, ağac! Gəl etmə anamı bağrı qan, ağac!
Dalıyca yenə demiş, Görək nələr söyləmiş:
– Köhlən atlar axar su tək axanda Bədöy ayğırıma, atıma yazıq! Mərd atalar gənc oğluna baxanda, Elimə, südümə, zatıma yazıq!
Qardaşlar, yoldaşlar seyrə varanda, Eşimə, tayıma, tuşuma yazıq! Şahin quşlar gözəl kəhlik alanda, Tərlanıma, şahin quşuma yazıq!
İgitlər atlanıb keyik vuranda, Bəylikdən doymayan özümə yazıq! Aşıqlar-ozanlar məclis quranda, Boyuma, sazıma, sözümə yazıq! –
Deyibən aslancığım Ürəklənib ağladı, Sıxıntısı, yanğısı Cigərciyin dağladı.
Bu yerdə Salur Qazan Çapar gəldi, yetişdi, Dalıyca çatdı çoban, Düşmənin aşı bişdi.
Çobanım yetişincə, Əl eylədi sapangə, Şöklü qara Məlikin Nəfəsi düşdü təngə.
Sapan-sapan, nə sapan Xan çobanın sapanı. Mancanıq olmayanda Daşı yıxar qalanı.
Daş yerisi – ayası, Bir balağın gönündən, Eşmə ala qolları Üç qoyunun yunundan.
Daş atar on batmanda, Atdığı boşa getməz. Göydə milçəyi vurar, Düşən yerdə ot bitməz!
Gecə bayırda qalsa, Qoyunundan, qoçundan, Qurd belə gəlib yeməz Sapanın qorxusundan.
Çoban sapan çatlatdı, Daş atdı, qaya atdı, Düşmənə gün qaraldı, Yer başına daraldı.
Söyləyir igid Qazan: – Mərə, Qaracıq Çoban, Gəl anamı istəyək, Versələr, alaq gedək.
Qarıcıqdır, yıxılar, Ayaq altında qalar. Sonra da yana-yana Üzün tutur düşmana:
– Mərə, ay Şöklü Məlik, Börkünün ucu dəlik! Altunlu ban evimi Çapıbsan, sənin olsun! Pulumu, xəzinəmi Qapıbsan, sənin olsun!
Bütün əhlim-əyalım Yesirin olub, olsun! Uca boylu halalım Əsirin olub, olsun!
Tutubsan, qulun olsun Oğlum qırx igidiylə! İlxı-ilxı atımı Alıbsan, minik eylə!
Sürü-sürü qoyunum Sənin şülənin olsun! Qatar-qatar dəvəmin Hamısı sənin olsun!
Bir xahişim var sənə, Anamı qaytar mənə! Savaşmadan qəyidim, Yolumu çəkim gedim.
Eşidibən Şöklü şah Hırlayır, gülür qah-qah:
– Vermərəm, mərə, Qazan, Rədd ol, sovuş buradan! Altunlu ban evivi Gətirmişik, bizimdir! Puluvu, xəzinəvi Gətirmişik, bizimdir! Halalın əsirimdir, Əyalın yesirimdir! Qulumdur oğlun Uruz, Bil ki, satmaram ucuz!
|