QANLI QOCA OĞLU QANTURALI
Selcan xatın alıb dedi: – Mərə, qavat oğlu qavat, Mən aşağı qulpdan tutdum, Sən yuxarı qulpa vardın. Qavat oğlu, gəl vuruşaq! Ox ilənmı, qılınclanmı, Vuruşursan? Atın çapdı bir təpənin Üstə çıxdı. Sadağından doxsan oxun Yerə tökdü. Təkcə iki ox saxladı, Peykanların qazıb atdı. Dəmirli ox atmaqlığa Qıymayıban: – At oxuvu, İgid! – Dedi. Qanturalı: – Qadınların Yolu başdır, sən at! – Dedi. Selcan xatın oxlarının Birin atdı. Zərbəsindən mərd igidin Başındakı qara bitlər Ayağına varıb yendi. Sonra qaçıb görüklüsün Qucaqladı. Barışdılar, soruşdular.
Qanturalı söy söyləmiş, Görək, dostlar, nə söyləmiş: – Arılıqdan yalap-yalap, Yalaplanan incə donlum! Yeni yağmış, qar üzünə Qan damlamış al yanaqlım! Qələmçilər qələm çalıb, Rəsm etdiyi qara qaşlım! Qoşa badam sığışmayan Püstədodaq, dar ağızlım! Yaraşıqlı, dal gərdəndə Qırx tutamda, uzun saçlım! Bu sözlərlə, bu işlərlə, Ay qız, səni sınardım mən. Bax gör sən tək görüklümü Öldürməyə, qıyardım mən?
İgidinin cavabında Alıb xatın nə söylədi: – Qalxıbanı öz yerimdən Durar idim, Qara yallı Qazlıq atım Minər idim, Şah babamın obasmdan Çıxar idim, Ceyranları, keyikləri Qovar idim. Dartışsaydım bir ox ilan Neylər idim? Dəmirsizcə bir ox ilan, İgid, səni sınardım mən. Bax gör səni öldürməyə, Şah igidim, qıyardım mən?!
İrağından küsü tutub Yaxınından gülüşdülər. Gizli-gizli yaxa tutub Aydın-aşkar iyləşdilər. Dadlı-dadlı damax verib Duzlu-duzlu əmişdilər. Qara yallı ağ boz atı Qamçılayıb yügürüşdülər. Üz çevirib bəy babanın Obasına irişdilər.
* * * Qanlı Qoca, oğlun gördü, Şükr qıldı. Gəlini ilə, oğlu ilə Yurda gəldi. Gül-çiçəkli göy çəməndə Çadır qurdu. At öldürdü, dəvə kəsdi, Buğur-ayğır, qoç qırdırdı. Aslan qızla qoç igidin Toyun tutdu. Bütün Oğuz bəylərini Ağırladı. Altunluca günlügünü Uca tikdi. Aslan qızla mərd oğlana Gərdək etdi. Onlar daha Muradına, məqsuduna Çatar oldu.
Yeddicə gün, yeddi gecə Toy tutuldu. Çağırdılar, Dədə Qorqud Gələr oldu. Boy boyladı, söy söylədi, Şadlıq çaldı. Alp ərənlər, mərd igidlər Gəldiyindən, keçdiyindən Söhbət açdı. Qoçaqların, dönməzlərin Hünərindən dastan düzdü. Boy yaratdı, nəğmə qoşdu, Alqış verdi:
– Xocam Tanrı xatın qıza, Ər oğlana fürsət versin! Hünərlicə comərdlərin Əl-qoluna qüvvət versin! Mərd çırağı günü-gündən İşıqlansın, yanar dursun! Ər ocağı dünya varkən Sönməz olsun! El-obasın ucaldana Qadir özü dayaq olsun! Bar gətirən ağacların Qol-budağı qırılmasın,
|