QANLI QOCA OĞLU QANTURALI
Boyu uzun Burla xatın, Saçı uzun Selcan xatın, Nigar xanım, Ərəbzəngi, Həcər xanım, Zeynəb paşa[3].
Uzaqlara neçün gedək, Həmin bu gün yurdumuzda Kəlağayısın yan bağlayan Mərd analar başdan-başa.
Tarlalarda, zavodlarda, Hər hünərdə, hər yarışda İşıqlı bir mayak kimi Dünyalara işıq salır.
Qadınlığın, analığın Yorğun gözü, tutqun bağrı Ona baxıb, qurtuluşa Yol axtarır, ilham alır.
Canım aşıq, gözüm aşıq, Çal qopuzun, aç dastanın. O sehrkar comərd əlin Pərdələrdə xoş dolansın.
Üzüqara, bağrıqara Cəhalətə cumub, batan, Qadınlığa böhtan atan Şarlatanlar bir utansın!
* * * Aşıq çömçəsini alır əlinə, Alnın qırışdırır, qaldırır qıpıq, Qıyır gözlərini, narın gülüşlər, Dərilir üzünə lal bir sərxoşluq.
Mənalı baxışı nələr andırır, O duyğun gülüşdən nələr ələnir? Üzündə xalqımın ruh ülviyyəti, Vüqarı, mənliyi, fəxri görünür.
Əzəldən məni də coşduran odur, Onu dinləmişəm, fıkrə dalmışam, O, vurğun könlümün ilk yavrusudur, Mən ilk ilhamımı ondan almışam.
O cadu əllərin tilisimindən, Özünü qurtaran hansıdı, kimdi? Könül ceyranının avçısıdır o, Bir müdhiş fitnədir bax gör ki, indi.
Özü də qərq olur öz nəğməsində, Tufanlar qoparır hər bir pərdədən, Açır xəyalının ağ yelkənini, Yenə də söyləyir Qorqud Dədədən.
Qədim Oğuz ellərində Qanlı Qoca adında bir Adlı-sanlı kişi varmış. Bu görüklü ixtiyarın Yetişmiş bir qoç oğlu var, “Qanturalı” çağırarlar. Qanlı Qoca bir gün deyir: – Dostlar, mənim atam öldü, Yeri-yurdu mənə qaldı. Yarınkı gün mən ölərkən Yer-yurdumda oğlum qalar, Nə yaxşı ki, canım sağkən Oğlanımı evləndirim.
Qanturalı babasının Sözlərini dinləyərək: – Baba, məni evləndirmək İstəyirsən? Mənə layiq Qız nə kimi olduğunu Bilirsənmi? – Deyə, oğlan, Artırıri: – Mən yerimdən qalxanatək Yerdən dura. Mən qaraqoç bədöy ata Minənədək atın minə. Qanlı kafər ellərinə Məndən qabaq hücum edə, Qılınc çala, baş gətirə. Qanlı Qoca: – Oğul, demək, Sən əyal yox, bir pəhləvan İstəyirsən, arxasmda Yeyib-içib dolanasan, Xoş olasan – deyə, gülür. – Bəli, baba, Mən elənçi istəyirəm. Yoxsamı sən, istəyirsən Varıb gedib Bir ciciban qız alasan? Nagəhandan yıxılıban Yerə düşsə, bağırsağı Düyün düşə?! – Deyə, oğlan Acıqlanır. – Gözüm oğul, acıqlanma, İstədiyin, dilədiyin O dilbəri tapmaq səndən, Qızıl tökmək, rizq vermək, Almaq məndən – Deyə, qoca Sinə gərdi.
Ərənlərin görkəmlisi Qanturalı belə görcək Atin mindi, Qırx igidin atlandırdı. İç Oğuzu, girib gəzdi, Bəyənəcək qız tapmadı. Qayıdıban evə gəldi. Qoca sordu: – Qız tapdınmı? Qanturalı: – Yansın Oğuz ellərini, Hər nə gəzdim, mənə yarar Qız tapmadım, baba! – Dedi.
Qanlı qoca: – Sabah gedib öylən gəlmək,
|