TƏPƏGÖZ
Qoyunlara qarşı vardı. Pəri qızı pırıldayıb: – Mərə, çoban, Yengi ildə məndə sənin Əmanətin olacaqdır, Gəl algilan. Amma bil ki, öz elivin Başına sən qada gətdin Deyə, uçdu.
Pəri getdi, çoban qaldı. Ayrılıqdan rəngi soldu, Qara bağrı dərdə doldu.
* * * Günlər keçdi, aylar ötdü, Oğuzların köçüş vaxtı Yenə yetdi. Sarı çoban köç eylərkən, Uzun minar ayağına Gəldi çatdı. Gördü ki, bir bağlı yatıb. Pəri qızı zahir olub: – Mərə, çoban, Əmanətin gəl al! – dedi. Bil ki, ancaq ellərivə Zaval gətdin. Bağlıcığı çoban görcək İbrət aldı. Geri dönüb əl sapana, Daşa tutdu. Daş vurduqca bağlı şişdi, Çoban qorxub qoyub qaçdı.
Məgər o gün Bayındır xan Bəylər ilən seyrə varmış, Uzun minar ayağına Yetişdilər. Gördülər bir nəsnə yatıb, Baş-ayağı anlaşılmır. Bəylər hamı Dövrə vurub dayandılar. Endi bir bəy, təpiyilə Onu təpdi. Vurduğucan nəsnə şişdi, Neçə igid daha endi, Hey təpdilər, hey böyüdü. Uruz Qoca atdan düşdü. O da təpdi. Məhmiz dəydi, bükəcəyi Dəlib yırtdı. İçindən bir oğlan çıxdı, Hər bir zadı adam kimi, Ancaq fəqət bir gözü var. Heyran qaldı, bəylər, xanlar.
Uruz Qoca Onu qapıb, Bayındır xan Qulluğuna gətiribən: – Görklü xan, bu oğlanı Mənə verin, aslan oğlum Busat ilən böyüdəyim. Bayındır xan: – Sənin olsun! – Deyə, keçdi. Uruz Qoca Təpəgözü Götürübən evə vardı. Buyurdu bir taya[3] gəldi, Təpəgözə əmcək verdi. Bir sorduqda Südün aldı, İki sordu, qanın aldı, Üç sorduqda canın aldı.
Bir çox taya gətirdilər Hamısını həlak etdi. “At südüylə bəsləyəlim” Söylədilər. Hər övnədə bir qazan süd Doyurmadı.
* * * Təpəgözü bəslədilər, Gəzər oldu. Uşaqlarla oynar oldu. Uşaqların kimisinin Qulaqların, Kimisinin burnun yedi. Bütün Oğuz əllərindən Cana gəlib, acizləyib, Bəy Uruza dəxil düşüb Yalvardılar, ağlaşdılar.
Uruz Qoca neylədisə, Kar kəsmədi. Naçar olub çıxarıban, Evdən qovdu. Pəri qızı uçub gəlib, Oğlanının barmağına Qəribə bir üzük taxtı: – Oğul, sənə ox batmasın, İti qılınc bədənivə Kar kəsməsin! – Deyə, getdi.
* * * Birgöz oğul varıb gedib, Sərt bir dağda məskən edib, Yollar kəsdi, adam yedi, Qorxulu bir quldur olub, Ad çıxardı. Üzərinə neçə-neçə Adam getdi, Ox atdılar, ox batmadı. Qılınc-qəmə kar etmədi. Hər gələni tutdu yedi. Bütün çoban-çoluqları Basıb-yeyib, oğuzları Yeməkliyə, əl eylədi.
Bütün Oğuz toplanıban Üzərinə axın etdi.
|