BƏKİL OĞLU ƏMRAN
Elində yaşayır el üçün ölən, Odur ki, el əziz, vətən əzizdir, Ölməzdir vətənin əməyin bilən, Nankor, el nə bilir – vətən nə bilir!
Fəqət özü üçün yaşayan zəlil, Beş günlük həyatdan göz yuma bilməz! Özün keçmişindən ayıran səfıl Heç vaxt gələcəkdən pay uma bilməz.
Ancaq eli üçün yaşayanların Ölüb getmək ilən ömrü qurtarmaz! Ölümlə həyatda bir bütünlük var, Gül toxum olmasa, toxum gül olmaz!
* * * Xanlar xanı Xan Bayındır Bir gün yerdən durmuş idi, Ağ ban evin qara yerin Üzərində qurmuş idi. Ala seyvan göy üzünə Ucalıban aşınmışdı. Min bir yerdə ipək xalça Döşənmişdi, salınmışdı. İç Oğuzu, Dış Oğuzu Qonaqlayıb oturarkən, Doqquz tümən Gürcüstanın[3] Xəracını gətirdilər (Bir gürz, bir at, bir də qılınc).
Bayındır xan bərk pərt oldu Çağırdılar, Dədəm Qorqud Gələr oldu. Şadlıq çaldı: – Xanım, niyə pərt olursan? – Deyə, sordu. – Dədə, necə pərt olmayım? Hər il bollu qızıl-gümüş Pul gələrdi, Bəylərimə, ellərimə Paylayardım, könülləri Xoş olardı. İndi bunu kimə verim, Kimlər qalsın? Qorqud Dədə: – Hər üçün ver bir igidə, Pasdar olsun mərzimizə, Yurdumuzun, ölkəmizin Sərhədlərin gözətləsin. Kimə verim? – Deyə, yenə Xanlar xanı soruşarkən, Qorqud Dədə Sağa-sola nəzər saldı, Heç kimsədən səs çıxmadı. Ancaq adlım igidlərdən “Bəkil” adlı bir bəy qalxdı. Dədə üzün ona tutdu: – Sən nə deyərsən?
İgid Bəkil yeri öpdü, Uru durdu, razı qaldı. Dədəm Qorqud öz əliylə Mərd igidə Qılınc asdı, əmud asdı, Şahbaz ata mindiribən Himmət verdi, yola saldı. İgid Bəkil ellərilən halallaşıb, Obasını qalxızıban Köçün çatdı, Bərdə-Gəncə Diyarına köçdü getdi, Gürcüstanın sərhədində Otraq etdi. Sərhəd üstə ayıq-sayıq Keşik çəkər, Hər yandan yad baş qovzasa, Başın əzər. İldə bir yol Bayındır xan Divanına qonaq gələr.
** * Yenə bir il xanlar xanı Bəkil bəyi çağırtdırdı, Bəkil gəldi. Peşkəş çəkdi, ulu xanın Əlin öpdü. Xan Bəkili ağırladı, Xələt verdi, xərclik verdi, Üç gün tamam qonaqladı. Dördüncü gün: – Üç gün daxi Bəkil xanı Ov ətilən qonaqlayaq, Bəylər! – Dedi. Xanlar hamı yaraqlandı, Silahlandı. Ov ovlandı, quş quşlandı, Sığın, keyik ov tutdular, Çığırtdılar. Yeyib-içib otururkən Hər tərəfdən söhbət düşür, Xanlar şişir.
Kimi özün, atın öyür, Kimi oxun, yayın öyür. Bir parası Kəndirindən, qılıncından Tərif deyir, içir-yeyir, Bəylər bəyi Salur Qazan Nə özün, nə atın öydü, Nə oxun, nə yayın öydü. Alp ərənlər hünərindən Tərif dedi. Üç yüz altmış comərd igid Ova varsa, Sığın, keyik üzərinə Axın olsa, Bəkil bəy nə yay götürər, Nə ox atar, Nə xəncər, nə qılınc taxar. Keyiklərin dalısınca
|