UŞUN QOCA OĞLU SƏGRƏK
Yüz əfsus ki, “Qardaş andı” Kimi, bəşər həyatının, Nabalıqlıq adətləri, Hələ-hələ zorluların Millətçilik duyğuları Qarşısında lazimi bir Silah kimi saxlanılır. Bu yaramaz çaxnaşmanın Ağacını kimlər yeyir? Varı-yoxu oğurlanmış, Dalı qalmış, doğranılmış, Kiçik ellər, “biz” kimilər.
İngilistan, Amerika, Fransa, ya İtaliya, İsraillər, Ərəb, Jermən, Hər zamanda, bu gün, dünən Millətçilik andlarına Dayanaraq belə ancaq, Hövkürürlər, güvənirlər.
*** Kimsə bunu açıq-aydın Ört-basdırsız deməsə də, Bərbəriyyət dövrəsinin Qanunları hələ-hələ, Şiddət ilən, hökm sürür. El-arxasız milliyyətlər, Hələ güclü çoxluqların Qüdrətsizlər zorluların, Töməsidir[5], köləsidir…
*** Mən: – İnsanlar bir-birinin Qardaşıdır, sırdaşıdır, – Deyə, – Bir gün, iki gün yox, Ömür boyu haray çəkib, Qələm çalıb, boğaz yırtıb, Şeir yazıb, yaratmışam. Həyatımın kitabçasın Varaqla bax, gör ki, ancaq, Heç dərdimi heç ağrımı, Məhkum insan dərdlərindən, Ayırıban bölməmişəm. Mən özümü, öz elimi, Yaxın-uzaq insanlıqdan Heç də artıq sevməmişəm. Mən yağlımı, yavanımı, Hər yerdənsə, hər eldənsə, Olur-olsun, hərgün-hər an Ac-yalavac insanlarla Bölməkligə hazir olub, Bu sözümdə sadiq durub, Tam varlıqla dayanmışam. Lakin, hələ, yazıq dünya “Millətçilik” xulyasına, İnadına davam edir. Humanizmi sayan kimdir, İnsanlığı anan kimdir?
Mən qüdrətli qolu zorba, Bir millətin şairi tək, Həyasızca öyünübən Ellərimə “Üstün nəjad”[6] Xulyası ilə hakim olmaq, İnsanların çalıb-çapmaq Dərslərini verməmişəm.
*** Mən əzilmiş, haqqı itmiş, Varı-yoxu əldən getmiş, Ağır-ağır sitəmlərə Məruz qalmış, əsir düşmüş Millətimin, millətlərin, Ömrü məhkum insanların, İnsanlığın şairiyəm. Oxucum, mən “Qardaş andı”, Deyə, – Bugün söz açsam da, Haqla məni, haqq ver mənə, Öz dərdimi çəkməsəm mən, Bu “vanəfsa” zəmanədə, Dərdlərimi kim çəkəcək? Vətəndaşım, yol yoldaşım, Qardaş andı fərqlənir, Millətçilik andı ilə. Sözlərimi artıq düşün, Dərin-dərin fikir eylə, Bütün insan kütlələri, Bir-birinə qardaş deyə, Qayğı çəkə, qəmin görə. Bilən yola uğramadan Doğru deyim hələ mən də Dönənmərəm öz andımdan. Hələ kiçik millətlərə “Qardaş andı” müqəddəsdir.
Bütün insan xırda, kəlan, Bir bağır tək qovuşmadan, Qardaş deyə, and içmədən, Öz andına qol çəkmədən, Bu qurtuluş yolundan mən Dönənmərəm hərgiz bir an Hələ-hələ “irq birligi”, “Qan birligi” zırnasını Çalanlar var dünyamızda.
*** Qan qardaşım, vətəndaşım, Məhkum insan dərdi – deyə, Hər ağrıvı, hər dərdivi, Çəkirəm öz dərdim kimi. Şənligində, qəmində də Səninlənəm, səninlənəm. Tam insanlar bəşəriyyət Ağ, qırmızı, sarı, qara Qardaş – deyə, sirdaş –deyə, Qucaqlaşıb öpüşmədən Doğmalıqlar, qardaşlıqlar Davam edib yaşayacaq!
|