Baxma şümşada, gözüm, sərvi-xuraman gəz-gəz
Baxma şümşada, gözüm, sərvi-xuraman gəz-gəz, Dərmə hər qönçəni, bir qönçeyi-xəndan gəz-gəz.
Hardadır abi-bəqa, çeşmeyi-zəmzəm nəçidir, Kövsərin adın eşit, badeyi-reyhan gəz-gəz.
Alma firuzəni, yaqutü zəbərcəddən keç, Dürri-nasüftə nədir, lə’li-Bədəxşan gəz-gəz.
Almanam bir pula mən bir qutu mirvaridi, Səni tari, təkə cum, gövhəri-rəxşan gəz-gəz.
Hər gözəl tiri-nəzər nəsb edə bilməz yayə, Aşiq öldürməyə bir gözləri qan-qan gəz-gəz.
Nə bilir nazü nəzakət nədi hər göyçək olan, Hüsnü xoş, xülqü gözəl, bir ləbi-xəndan gəz-gəz.
Getdi Şirinü Züleyxa, ələ gəlməz Leyli, İndi bu əsrdə kim, afəti dövran gəz-gəz.
Mümkün olmaz bu vəcahətdə gözəl dünyadə, Rüb’i-məskuni dolan, aləmi hər yan gəz-gəz.
Tapmasan dəxi Nəbati kimi əfsanə deyən, Əlinə şəm’ götür, gün kimi yan-yan, gəz-gəz.
|