Qızıl gәncliyimin dәyәrli dostu
Alagöz Yelena, xanım Yelena!
Vәfasız deyilәm ölüncәyәdәk,
Hazıram başına dönüm, Yelena!
Neylәyim ki, fәlәk çox yaman sıxdı,
Onsuz da viranә qәlbimi yıxdı.
Dostlarımın çoxu vәfasız çıxdı,
Heyrәtdәn qurudu qanım, Yelena!
Gürcüstan qәşәngdir, buna yox sözüm,
Gәzәrkәn yurdunda sevinir gözüm.
Gürcü yaxşı dostdur, görmüşәm özüm,
Onlardan birinci, canım Yelena!
Qәlbim kimi qәlbin, bilirәm, safdır,
Var olsun gözlәrin, yaxşı sәrrafdır.
Deyәnlәr var: “Dostluq bir quru lafdır”,
Onları insanmı sanım, Yelena?!
Doğrudur, dostluqda keçәn bu on il,
Sevәn bir qәlb üçün çox ömür deyil:
Ancaq mәn istәrdim, onu yaxşı bil,
Ağarsın tellәrin, yanım, Yelena!
1935-ci il, 10 iyul