Soruşursan, sәni sevdaya salan,
Hardadır o indi qızlar gözәli?
Mәn unutmuşdum o sevdanı, inan,
Duyğusuz qәlbili dövranın әli
Mәni sarsıtdı, unutdum adını,
Mәnә, gәl, sorma o solğun qadını!
Mәni çox gәnc ikәn ağlatdı zaman,
Çәkәrәk pәrdә o xoş mәnzәrәyә.
Mәnim ilk eşqim, ilk әldә haman
Kömdülәr, bilmәdim, amma nәrәyә?
Onu döndәrdi xәzan yarpağına,
Nә deyim mәn o yerin torpağına!
Anlaşılmaz düşünüb söylәdiyim,
Nә durur qәlbim o gündәn, nә duyar,
Mәn ki, hala yenә sәrsәm kimiyәm,
Yenә qәlbimdә o dәrdin izi var.
Lәnәt ömrün bu ağır illәrinә,
Onu döndәrdi xәzan yellәrinә.
Bir soran yoxmu o zalım fәlәyә,
O mәnim gәncliyimin qatilinә:
Niyә qıydın sәn o solğun mәlәyә?
Bu vurub, yıxmağının qayәsi nә?
Nә deyim, böylә, bu mәnasız işә
Sonu yox, sıtmalı sәrsәm gedişә...
1923