ALIB BU KÜLƏYİ ÇİYNİMƏ
Alıb bu küləyi çiynimə Qaldıracağam tüstülü boruların zirvəsinə, Düyünləyib tüstü buluduna çəkəcəyəm küləyi. Tüstüdə iş günləri, dəzgah səsi, fəhlə ürəyi... İşıq yandıracağam minarətək göylərə dirənən boruların üstündə, - Məryəm kimi başında işıq haləsi; Görənlər deyəcək: zühr edib İsanın anası... Alıb bu küləyi çiynimə çırpacağam xəzəl pullara, Ciblərə gedən gizli yollara, Çırpacağam arxasınca kişidən çox göz gəzən gözəl dullara, Çırpacağam hər gecə birinə sarılan qollara... Tuşlayacağam kürsülərdən deyilən sabun köpüklü sözlərə, Bu küləyi qumla qarışdırıb çırpacağam gecə barlarında xumarlanan gözlərə; Alıb bu küləyi çiynimə bahara verəcəyəm çiçəklərlə oynasın. Payıza verəcəyəm yarpaqlarla oynasın, Qışa verəcəyəm bəyazlıq içində qarla oynasın. Sonra çəkib ciyərlərimə dolduracağam rezin şarları, Qoy bu külək bir az da uşaqlarla oynasın...
|