FİKİRLİ ADAMLAR
Gecəni fikirlə səhərləyərlər İnamı yolunda ovod adamlar. Vərəmlə, İnfarktla zəhərləyərlər Ürəkli kəsləri robot adamlar.
Ürək döyünəcək... sıxılanda da O, yeni bir həyat nəfəsi tapır. Fikirli adamlar yıxılanda da Torpaqda cazibə qüvvəsi tapır.
Duyğulu başlarda fikir daşınar; Yağış yağacaqsa şimşəklər çaxar. Sərxoş sürücülər, Nasaz maşınlar Fikirli adamlar ovuna çıxar...
Dağların ürəyi sözlə dolanda Zirvələr görünmür, bürünür çənə; Nədənsə, gün batıb, axşam olanda Bu dünya fıkirli görünür mənə.
Keçir beyinlərin qaranlığından Fikirlər müqəddəs bir ziya kimi. Fikirsiz, qayğısız, duyğusuz insan Yaşayır dünyada bir röya kimi...
Hamar olmayıbdır fikrin meydanı, Zaman başqa cürə görüb əlacı. Fikri əsrləri qabaqlayanı Ya tonqal gözləyib, Ya dar ağacı. Sısqa bulağına ümman deyənlər Çəkir fıravanlıq, şahlıq fikrini. Bilmir ki, cığırda iməkləyənlər Yıxılır naşı bir kəndirbaz kimi.
Axıb, Axa-axa durulub sular. Ətəklər sellərin, Zirvə qarındır. Bu günü fikirlə yaradıbdılar, Sabah da Fikirli adamlarındır...
|