AĞLAYAN TAPILACAQ...
Onu təkərlərin altında gördüm, kəsilmiş qolu özündən xeyli aralı idi. Fikrin hardaydı, qardaş, Daha qanlı dodağın tərpənməz, Açıq gözlərin qırpılmaz; Səni ağlayan tapılar, Ömür verən tapılmaz... Yolun haraydı qardaş, Yolun səndən aralı. Kimi belə axtarır Qolun səndən aralı?! Bu qolların üstünə Yenə saçlar səpilər, Saçlar boyu süzülüb İsti yaşlar səpilər, Özün boyda məzarda Qara daşlar səpilər... Qolun səndən aralı Evə tələsdi bəlkə. Sənə çatmasın deyə O, qatara dirənib Yolunu kəsdi bəlkə. Bu, qatar zalım qatar Ömrünü kəsməmişdən Qolunu kəsdi bəlkə... Bu axşam qapınızı Bu kəsik qol döyəcək, Sənin yoxluğunu da Bu kəsik qol deyəcək. Körpələrin yenə də Qapıya yüyürəcək, Sinəni axtaracaq, Qısıla bilməyəcək. Bu kəsilmiş qolundan Asıla bilməyəcək... A qardaş, oyan, olmaz, Qollarını göndərmə, A qardaş, dayan, olmaz! Yoxluğunu deməyə Kimsənin dili gəlməz. Tək qolunu yumağa Kimsənin əli gəlməz. Bir üzü qız gəlinin Bir daha üzü gülməz. Bəlkə də od içində O, könlü tox gəzəcək, Yuxusuna girənlər Bir qolu yox gələcək. Saçını oxşamağa Göz yaşını yığmağa, Kədərini boğmağa. Bir əli çatmayacaq, Sənə qovuşmaq üçün Əlini uzadacaq İrəli, Çatmayacaq... Fikrin hardaydı, qardaş, Daha qanlı dodağın tərpənməz, Açıq gözlərin qırpılmaz, Səni ağlayan tapılar, Ömür verən tapılmaz...
|