O gecə tor atdım dənizə,

Dəniz, gecə,

     xırdaca balıqlar,

     ulduzlar

     süzüldü tordan...

Bəyaz bir su pərisi çırpındı

     hörümçək toruna düşmüş

     kəpənəktək.

Çırpındı, çırpındı,

Bomboz libas geydi qumlardan.

Qırdım ipək sapların ilməsini,

Kəsdim ləpələrin sözünü, kəlməsini

     aldım su pərisini əlindən...

Öpdüm ipək saçların

     nəmli şırımlarından,

Yaxın qumlar eşitdi pıçıltılarımızı,

İpək saplar kəsə bilmədi aramızı,

Yüyürdü dalğalar,

Süründü ləpələr,

Əzildi qum təpələr,

Gövlər ulduz-ulduz deşildi,

Sahil eşim-eşim eşildi,

Sonra...

Dalğalar peşmən qayıtdı,

Ləpələr yatdı,

Qum təpələr yayıldı,

Göylər ulduz-ulduz söndü,

Sahil ləpir-ləpir ütüləndi...

Dənizə qayıtmaq istəmədi su pərisi,

Adama çevrilmişdi qalan yarısı;

Sakit-sakit baxırdı qızaran göyə,

Balıqlar lap yaxına gəlmişdilər,

Qulaqlarını atmışdılar sahilə

Bir şey eşitsin deyə...