Gözü yumuludur bu gecənin,

Çəkilib öz dünyasına.

İşıq-işıq oyanır pəncərələr

Düzülür evlərin mərtəbə sırasına...

Gözü yumuludur bu gecənin,

Ayağının altında

          cığır itir, iz itir,

Gözbağlayıcı kimidir,

          örtüyü altında

          qaralıb mavi dəniz itir.

Gözü yumuludur bu gecənin,

Laylay örtür uşaqların gözlərini,

Yuxusuzlar

          yıxıb çarpayıya özlərini

Şirin bir uyğu həsrətində.

Lunatiklər aya doğru yeriyir,

Gözlər yuxu içində,

          ayaqlar öz sürətində.

Gecənin pəncərə dişlərindən

          səssiz gülüş tökülür,

Pəncərələr söndükcə

          elə bil

          gecənin dişləri çəkilir...

Ağrıdan yumub gözlərini bu gecə

Gözüyumulu yeriyir

          işıq dirəklərini

          əl ağacı kimi

          səkilərə döyə-döyə.

Bu gecəni

          bir xəstə gözlərində

          xərəyə qoyub

          səhərə aparacaqlar.

Hələ ki,

          gecənin əllərini qızdırır

          korun-korun yanan ocaqlar;

Yumub gözlərini tüstü acısına

Üşüməkdən qorxur bu gccə.

Qara bir şəlalətək

          içinə axır bu gccə.

Qaranlığı alıb əlinə

          adamlardan süpürür küçəni,

Tənhalığımdan xəbəri yox,

Gözü yumuludur bu gecənin...