Sən şairsən, sevərsən al yanaqlı al-gülü,

Süslənmiş göy çəməni, yaşıl geymiş sünbülü,

Ayrılıqdan solaraq o saralan bülbülü,

Mən kəndliyəm sevərəm həm də Muğanı, Mili,

Qoy səni el anlasın,

Danlayanlar danlasın,

Şerin gözəl yurdumu

Özünə nişanlasın.

Kaman qaşdan yazmaqdan qəddin kamana döndü,

Qara gözlər sevməkdən göz yaşın qana döndü,

Yarın o qara zülfü şahmar ilana döndü,

Sarıldı öz boynuna - sevgin yalana döndü.

Qoy səni el anlasın,

Danlayanlar danlasın.

Şerin gözəl yurdumu

Özünə nişanlasın.

Açılır qarşımızda yeni səhnə günbəgün,

Qurulur yurdumuzda hər gün yeni bir düyün,

Göz qorxudan nurunu alır bizdən Ayla Gün,

Nəfəsim, heç tutulma, ürəyim, dur, az döyün,

Qoy səni el anlasın,

Danlayanlar danlasın,

Şerin gözəl yurdumu

Özünə nişanlasın.