Səndən ayrı düşən könlüm nə etsin,

Vəslinin sevdası oynar başımda.

Vəsiyyət etmişəm müsəvvir çəksin

Əksi-rüxsarını məzar daşımda.

Hicran havasına gəzdim sərsəri,

Aradım ardınca bütün hər yeri,

O ulduz gözləri gördükdən bəri,

Mən nələr çəkmədim bu az yaşımda.

İstərəm ki, görüm o nazlı yarı,

O qönçə ləbləri, gül yanaqları,

Göz yaşım qoysaydı baxardım barı,

Ah!.. Mənə düşmənmiş o göz yaşım da.