Öldüm
Mənə, ey pəri, eylə bir çarə, öldüm, Əlindən mən oldum günü qarə, öldüm.
Qəmü möhnətində gecəm-gündüzüm yox, Nə qədr incidirsənsə, incit, sözüm yox! Cahan içrə heç şeydə yoxdur gözüm, yox! Fəqət, mailəm mahi-rüxsarə, öldüm! Əlindən mən oldum günü qarə, öldüm!
Deyib dərdimi, istədim çarə səndən, Təzərrö yalvarə-yalvarə səndən. Dəva olmadı bu dili-zarə səndən, Məni, ey sənəm, yaxma odlarə, öldüm! Mənə, ey pəri, eylə bir çarə öldüm!
Bu olmaz, yəqindir, gözəllər cəfasız, Cəfasız gözəllər olurlar səfasız. Mənə etmə tərki-cəfa, ey vəfasız! Cəfa tərkin etmə məni-zarə, öldüm! Əlindən mən oldum günü qarə, öldüm!
O gündən ki, bir yerdə sənlə görüşdüm, O gündən ki, eşqində damə ilişdim, Qəmindən, vəfasız, böyük dərdə düşdüm! Gəlib qılmadın çarə, biçarə öldüm! Mənə, ey pəri, eylə bir çarə, öldüm!
|