Eylədikcə vəslini, ey nazəninim, mən xəyal,

Bədr ikən, hicrin məni incəldib etmiş bir hilal,

Qorxuram keçsin günüm həsrətlə, etməzdən tülu,

Asimani-ömrüm içrə başlasın nagəh zəval.

Düşmədən dürd ilə həmtərkib ol mey camına,

Ey pəri, ləli-ləbindən busə almaqdır mahal.

Rəhmə maildir gözün istər məni etsin xilas,

Qaşların tiğilə qəmzən etmək istər payimal.

Dil verib rüxsari-alın həm gözüm, həm könlümə,

Onların mabeyninə salmış bu üzdən qeylü qal.

Niyyəti-vəslinlə Quran ağzı açdırdım vəli,

Vəh nə xoşdur ayeyi – “səbrən cəmilən” gəldi fal1

Görcək ol məhparəni aç söylə sirri-eşqini,

Pərdeyi-ixfanı cır at, olma Bədri, nitqi lal.