Su göz yaşından duru,

Ləpəsi, dalğası yox.

Ürək kimi ilıqdır,

Nə istidır, nə soyuq.

Bura nə tor atan var,

Nə də tilov sallayan.

Nə sahil qumları var,

Nə də minillik qaya.

Qəlbi kimi sağı da,

Solu da soyuq şüşə,

Ümmandan qaçanları

Belə gördüm həmişə:

Balığın dünyadan xəbəri yoxdur.

Pəncərə qabağında

Qayğı yuxusundadır.

Bu üzdüyü sularda

Yoxdusa yosun dadı

Yadına da düşməyir.

Ömürdən arxayındı, -

Başqa balıqlar kimi

Tavada ki, bişməyir.

Anlamayır hələ o.

Gərəksizlik dərdini.

Arxayın ömür sürmək

Çox böyük hünərdimi?

Balığın dünyadan xəbəri yoxdur.

Yem qayğısı çəkən var,

Böyük balıqlar üçün

Özü yemə dönməyir.

Qasırğada, tufanda

Daşa dəyib ölməyir.

Sakit yaşamaq üçün.

Bir cam su da bəsidi,

Bu su ona dünyadı,

Bütün Yer kürəsidi;

Balığın dünyadan xəbəri yoxdur.