VAR Kİ
Zaman – vaxtın axını, Uzaq etmə yaxını, Görmədiyi yuxunu O qədər yozan var ki!
Qoç bilib quzusunu, Gizlədib ruzusunu, Özgənin yazısını O qədər pozan var ki!
Ümid – uzaq bir çıraq, Ömür yazın bir varaq. Ayağın altına bax, O qədər qazan var ki!
Kaman saxlamır oxu, Çiçək gözündə qorxu. Güllər neyləsin axı, O qədər üzən var ki!
Sən saxla gözünü tox, Sındırma özünü çox. Aclığa dözümün yox, O qədər dözən var ki!
Şeytan bicliyi pulda, Dovşan qorxusu kolda, Əzbər bildiyi yolda O qədər azan var ki!
Ağlama için-için, Ayrıl içindən köçün. Həqiqət gəzən üçün O qədər düzən var ki!..
|
© 2011 Ədəbiyyat portalı - www.azerlit.info