Qeybdən yetdi bizə müjdə ki, cananə gəlir
Qeybdən yetdi bizə müjdə ki, cananə gəlir, Nazilən zülfi-pərişanə çəkib şanə, gəlir, İzzətü şövkətilə ol büti-fərzanə[i] gəlir, Qıl tamaşa gözüm, ol sərvi-xuramana, gəlir, Tökməyə aşiqinin qanını mərdanə gəlir.
Oldu mayil yenə bir afəti-dövranə könül, Az qalıb şölə çəkib, eşq oduna yanə könül. Can fəda eyləginən ol şəhi-mərdanə, könül! Baxıban seyr elə sən ol məhi-tabanə könül, Qıl tamaşa gözüm, ol mehri-dirəxşanə, gəlir.
Elədi mah-rüxim, aşiqini yad genə; Oldu viranə könül müjdədən abad genə. Dil olub qüssəvü qəmdən bu gün azad genə, Badeyi-vəsli-rüxi-yarilə dilşad genə, Meyi-vəhdətdən olub gör necə məstanə, gəlir.
Ruzi-əvvəl ki, gözüm ol məhi-tabanə baxıb, Gözümün yaşi ilə Dəclələr Ümmanə axıb, Əşkimin danəsini gərdəninə üqd[ii] taxıb, Qəddi xiclət oduna sərvi-xuramani yaxıb, Özü səd tənə vurub Yusifi-Kənanə, gəlir.
Güli-bixar açılıb gülşəni-can içrə bu gün, Ruh tək cilvə elər mülki-rəvan içrə bu gün, Yox onun tək dəxi bir şah cahan içrə bu gün, Ədli Kəsranı qılıb kəsr şəhan[iii] içrə bu gün, Şövkəti verdi şikəst təxti-Suleymanə, gəlir.
|