Kimdi eşqində sənin, ey gül, giriftar olmasın
Kimdi eşqində sənin, ey gül, giriftar olmasın. Kimdi dilbər, hüsnünə canla xiridar olmasın.
Kimdi o arif kim, aşiq olub şux ruyinə, Vəqf edib canın sənə aşiqi-bizar olmasın.
Mənə ey mahi-cəbinim, hüsnünü görmək çətin, Bu səbəbdən məhzunam, dil neyləsin, xar olmasın.
Qorxuram ki, ruyini görcək mənim çıxsın canım, Canda canlıq qalmayıb – çıxsın, mənə yar olmasın.
Sənə qurban kəsməyə yalnız mənim canım qalıb, Qorxum ondadır bu da, layiq, səzavar olmasın.
Sən ümid etdin ki, Heyran, o sənin yarın olar, Kəs ümidin ey fəqir, qorx vəsli-dildar olmasın.
|
© 2011 Ədəbiyyat portalı - www.azerlit.info