Ey mürği-Süleymani, qalx, bir də pərəfşan ol!
Ey mürği-Süleymani, qalx, bir də pərəfşan ol! Get xidməti-cananə, xoş dillə qəzəlxan ol!
Ey qəmli könül, durma, get başına qıl çarə, Ver qəlbini dildarə, həmsöhbəti-rindan ol!
Vur sən cahana atəş, tap da özünə bir əş, Minnət yemə, zəhmətkeş, nə xadimi-sultan ol!
Ey xatiri-dil pürqəm,[i] tərk et özünü bir dəm, Nə vəsli təmənna qıl, nə bəndeyi-hicran ol!
Tərk et iki dünyani, bu aləmi idrak et, Nə məzhəbə ol talib, nə peyrovi-iman[ii] ol!
Nəfsin ki, deyil xorsənd, etdi səni sərgərdan, Nə aləmə bel bağla, nə tabei-şeytan ol!
Asudəlik istərsən, dünyadan uzaqlaş sən, Keçmişlərə et tövbə, təqsirinə peşman ol!
Boşdur görünən aləm, hər pərdəsi min bir qəm, Yar vəslinə çat hərdəm, aşüftəvü Heyran ol!
Düş bəhri-məhəbbətdə bir qütə[iii] vurub çıx sən, Hər bir şeyi tərk eylə, tək bəndeyi-canan ol!
İstərsən əgər şahlıq, şöhrət, əzəmət, hörmət, Həm əhdə vəfa eylə, həm faili-peyman[iv] ol!
Yol torpağına Heyran, can nəqdi nisar eylə, Ol şahə özün Heyran, bir ləhzədə qurban ol! [i] Pürqəm – Qəmlə dolu, çox dərdli. [ii] Peyrövi-iman – Iman tərəfdarı. [iii] Qutə – Suya cummaq, suya baş vurmaq. [iv] Fayili-peyman – Sədaqətli adam, vəfalı.
|