Gözəllər içrə, ey canan, sən oldun sərvəri-xuban
Gözəllər içrə, ey canan, sən oldun sərvəri-xuban, Üzündür bir günəş guyi, ona zülfi-kəcin çövkan.
Camalın gülşən olmuşdur, nə gülşən, gülşəni-xubi, Nə xubi, xubiyi-Yusif, nə Yusif, Yusifi-Kənan.
İki zalimdir ol gözlər, nə zalim, zalimi-kafər Nə kafər, kafəri-rəhzən[i] nə rəhzən, rəhzəni-iman.
Ləbi-Ləlin olub qönçə, nə qönçə, qönçeyi-lalə, Nə lalə, laleyi-cənnət, nə cənnət, cənnəti-rizvan.
Olub xali-ləbin hindu, nə hindu, hinduyi-sahir Nə sahir, sahiri-fitnə, nə fitnə, fitneyi-dövran.
Dilin bir bülbülə bənzər, dəhanın çeşmeyi-safə, Nə bülbül, bülbüli-xoşgu, nə çeşmə, çeşmeyi-heyvan.
Olub Heyran sənə aşiq, nə aşiq, aşiqi-bidil, Nə bidil, bidili-valeh, nə valeh, valehi-Heyran.
|
© 2011 Ədəbiyyat portalı - www.azerlit.info