Görsə ay, ya ki, günəş nuri-cəmalini sənin
Görsə ay, ya ki, günəş nuri-cəmalini sənin, Sovurar öz başına xaki-məhalini sənin.
Saydı aşıqlar o gül çöhrəni qəlb ayinəsi, Qiblə etdi ürəfa əbri-hilalini sənin.
Harut öz sehrini yaddan çıxarar, görsə əgər O gözəl gözlərini, seyrü vüsalini sənin.
Dirilik çeşməsidir sözlərin ariflər üçün, Daha üstün sayır onlar ləbi-alini sənin.
Tutmağa can quşunu tor ilə dən lazımdır, Dedilər tor saçını, dən isə xalini sənin.
Xızr tək ölməz olar bağrına kim bassa yəqi O gül əndamını bir də pərü balini sənin.
Tanrı odla çiçəyi yan-yana xəlq etmiş ki, Dərdli Heyran ətrindən duya halini sənin.
|
© 2011 Ədəbiyyat portalı - www.azerlit.info