AVTOPORTRET
İçimdən qəm ilməli əriş-arğac keçibdir, Sevinc yarıtox gəlib, qəm yarıac köçübdür, Sel olan göz yaşımı bir ehtiyac içibdir; Tanış olaq, oxucum, tanış olaq: bu mənəm.
Bəlkə göydən gəlmişəm, yerdə yerim yox mənim, Nəyim varsa deyirəm, özgə sirrim yox mənim. Bir dəfə soyulmuşam, daha dərim yox mənim, Tanış olaq, oxucum, tanış olaq: bu mənəm.
Əllərimi uzadıb göylərə kök atıram, "Şeş"i nəzərdə tutub həmişə "yek" atıram. Mən şer yazmıram ki, ürəkdən yük atıram. Tanış olaq, oxucum, tanış olaq: bu mənəm.
Sakit görəndə məni quzu qoçdu həmişə, Qoç olanda qarşımdan quzu qaçdı həmişə, Ürəyim doludursa, cibim boşdu həmişə, Tanış olaq, oxucum, tanış olaq: bu mənəm
Ömrüm gəl-get meydanı, dost ba zarı ucuzdu, Nə qonmağım qonmaqdı, nə uçmağım uçuşdu. Ömür udmaq istədim, günlərimi uduzdum, Tanış olaq, oxucum, tanış olaq: bu mənəm
Eynək taxdım gözümə, şüşəsini yox gördüm, İsti söz arxasında ürəyi soyuq gördüm. Yatdım ki, yuxu görəm?!. Nə gördüm, oyaq gördüm, Tanış olaq, oxucum, tanış olaq: bu mənəm.
Əlim kəndir axtardı iynəsiz ağ sap gəldi, At istədim köməyə bir atsız axsaq gəldi. Bir təpəyə söz dedim ona qahmar dağ gəldi, Tanış olaq, oxucum, tanış olaq: bu mənəm.
|