|
VƏTƏN ALOV ETSİN ODUNU SƏNİN
Vətən alov etsin odunu sənin, Böyü bu torpaqla, bu yurdla öyün. Mən Araz qoydum ki, adını sənin Evimdə Arazı çağırım hər gün.
Bil ki, bu torpağın Araz dərdi var, Kim deyir Arazın bir az dərdi var, Don vurmuş həsrətin muraz dərdı var, Hələ ki, sonunu görən tapılmır.
Qardaş kef içində, bacı pərişan, Təndiri kor gözdür, sacı pərişan. Əllərdə yolunan saçı pərişan, Niyə daraq çəkib, hörən tapılmır.
Bu həsrət həmişə təzədir, təzə, Sərhəd dirəkləri soxulur gözə. Ümidin küləyi toxunub bizə, Hələ nişanını verən, tapılmır.
Sulara deyirik əhvalımızı, Cavabsız görürük sualımızı, Göz yaşıyla yuduq dəsmalımızı, Gəlib bu dəsmalı sərən tapılmır.
Əlimiz yetişmir, göz görə-görə, Oğulsan bu dərdə döz, görə-görə, Biz ümid toxumu səpmişik, yerə, Dər, oğlum demə ki, dərən tapılmır...
Vətən alov etsin odunu sənin, Böyü bu torpaqla, bu yurdla öyün. Mən Araz qoydum ki, adını sənin Evimdə Arazı çağırım hər gün.
|