Yaraşıqlı boyuna sərvi-xuraman dedilər
Yaraşıqlı boyuna sərvi-xuraman dedilər, Ləl tək ləblərinə canlar alan can dedilər.
O günəş çöhrəni hər vaxtda ki, etdinsə əyan, Ay bulud içrə girib, oldu peşiman, dedilər.
Qaşların taqinə hər yerdə kaman söylədilər, Sehrikar gözlərinə nərgisi-fəttan[i] dedilər.
Xalına can quşunun danəsi ad verdi görən, Müşk tək saçlarına silsilə zindan dedilər.
Danışanda ölülər cana gəlir nitqindən, Sənin hər bir sözünə çeşməyi-heyvan dedilər.
Qüssədən canım əgər yansa, təəccüblü deyil, Çöhrəni görmək üçün yox daha imkan, dedilər.
Vay o aşiqlərə ki, nalə çəkir hicrindən, Gözlərindən boşalır yaş yerinə qan dedilər.
Daim əğyar gözü nurə gəlir vəslin ilə, Yalnız əfqan eləyib ağlayır Heyran, dedilər.
|
© 2011 Ədəbiyyat portalı - www.azerlit.info