Xoş olur səninlə cana, gecə bəzmi-eşq qurmaq,

Gahi nazını çəkib, gah sənə naz edib oturmaq.

Verərək də son fəraqə, oturub qabaq-qabağa,

Söz açıb gah ayrılıqdan, gahi razi-hal sormaq.

Sayılar böyük səadət mənə gər nəsib olarsa,

O gözəl sənəm yolunda başımı verib də durmaq.

Mənim ey gözəl həbibim, nə olur da bir savab et,

Nə rəvadı hicr odunda öz həbibini qovurmaq.

O sevimli dilbərin ki, üzü çox gözəldi güldən,

Bacarar bu hüsnə dair təzə şübhələr doğurmaq.

O gülün fəraqi ilə düyünüm daha açılmaz,

Düyün üstə heç rəvadır təzə bir düyün də vurmaq?!

O gözəl bütün önündə, baş əyib pərəstiş etmək

Xoş olar, həm arxasında dayanıb namaz qılmaq.

Gecə-gündüz eyləyirsən nə üçün gilayə, Heyran,

Nə rəva ki, yar əlində belə qəm büsatı qurmaq?