Ey hüsndə Yüsifi-zəmanə
Ey hüsndə Yüsifi-zəmanə, Rəhm eylə fəqirü natəvanə.
Bir an səni görməyəndə, yarım, Əfqani yetirrəm asimanə.
Əflakə kəmənd atdı sənsiz Hər ah ki, çəkdim aşiqanə.
Yaqut ləbindəki təbəssüm Saldı genə könlümü gümanə.
On dörd gecəlik bir ay üzün tək Billah ki, gəlməyib cəhanə.
Gah qan tökər və gah içər qan, Ol sərvi-qədə budur nişanə.
Heyran görüncə ay camalın, Oldu genə eşqdə fəsanə.[i]
|
© 2011 Ədəbiyyat portalı - www.azerlit.info