Can zarə gəlir ta ki, o cananə qayıtsın
Can zarə gəlir ta ki, o cananə qayıtsın. Rəhmi gəlibən hali-pərişanə, qayıtsın.
Ol zülfi-xəmin yol itirib, üzdə dağılmış, Tənbih elə, vur-tarına bir şanə, qayıtsın.
Gördü üzüvi, tərk elədi canımı könlüm, Üz vermə ona, ta dili-divanə qayıtsın.
Ya rəb, nə olur hali onun ayrılığından, Biçarə əgər bir də bu viranə qayıtsın?
Pərvaz qılıb tutiyi-təbim bu çəməndə, Xali-ləbüvi göstər ona danə, qayıtsın.
Ya rəb, nə olur dəfi-xumarinə fəraqın, Saqi dolanıb, bir də o peymanə qayıtsın.
Gülzari-vüsalində uçub mürqi-həyatım, Ürküt ovu, ey nalə, gülüstanə qayıtsın.
Məcnun oluban hicrdə mən çöllərə düşdüm, Ey bari-xuda, rəhm elə, fərzanə[i] qayıtsın.
Çün bütkədədən Kəbəyə əzm eylədi Heyran, Bir lütf ona eylə ki, mərdanə qayıtsın.
|
© 2011 Ədəbiyyat portalı - www.azerlit.info