Ey sitəmkər, məni rüsvayi-cahan eyləmisən
Ey sitəmkər, məni rüsvayi-cahan eyləmisən. Gözümün yaşını çün Dəclə, rəvan eyləmisən.
Həmnişin eyləmisən düşməni, ey mayeyi-naz, Rəşgdən[i] canım alıb, bağrımı qan eyləmisən.
Gün kimi arizinə zülfi-çəlipanı[ii] salıb, Günü gör, əbri-siyəh[iii] altda nəhan eyləmisən.
Naz ilə, işvə ilə seyr eləyib gülzari, Göstərib möcüzə sən, sərvi rəvan eyləmisən.
Bir canım var idi, ey şux ki, aldın o zaman, Özgə can dəxi bu bikəsdə güman eyləmisən?
Qaşların tiqi-sitəm almış ələ, kirpiyin ox, Öldürürsən məni nahəq yerə, qan eyləmisən.
Neçin ey şux, niqabın götürübsən üzdən, Ruyi-xurşidvəşin[iv] xəlqə əyan eyləmisən?
Almısan əqlimi sərdən mənim, ey afəti-can! Qəddimi möhnəti-hicrində kəman eyləmisən.
Həsrəti-vəslüvilə, ey məhi-mən, Heyranı Başı yerdə, gözü yolda nigaran eyləmisən. [i] Rəşk – Həsəd. [ii] Zülfi-çəlipa – Çarpaz saçlar, burma saçlar. [iii] Əbri-siyəh – Qara bulud. [iv] Ruyi-xurşidvəş – Günəş üzlü.
|