Yarın ləbi, gör, ləli-Bədəxşani bəyənməz
Yarın ləbi, gör, ləli-Bədəxşani bəyənməz. Dürci-dəhəni[i] qönçeyi-xəndani bəyənməz.
Hər kim görə dəndanlərin, gahi təbəssüm, Həm gövhəri, həm lölöi-qəltanı bəyənməz.
Yarın məhi-ruyini görən ruyi-zəmində, Göydə dolanan mehri-dirəxşanı bəyənməz.
Ol zülfi-səmən-sayə[ii] baxan dövri-rüxində, Gülzardəki sünbülü reyhanı bəyənməz.
Yarın qədini görsə əgər qumriyi-bidil, Gülşəndə bitən sərvi-xuramanı bəyənməz.
Hər kəs ki, tutub kuyi-visalində təməkkün,[iii] Billah, verələr təxti-Süleymanı, bəyənməz.
Ey şahi-zaman, şahi-cahan, gərçi Züleyxa Görsə üzünü, Yusifi-Kənanı bəyənməz.
Hər kəs ola carubkəşi-dərgəhi-canan,[iv] Bil bunu yəqin, təxtdə sultanı bəyənməz.
Heyran, əgər tutsa vətən yar dərində, Gəlməz gözünə, rövzeyi-rizvanı bəyənməz. [i] Dürci-dəhən – Kiçik ağız. [ii] Zülfi-cəmənsa – Yasəmən saçlar. [iii] Təməkün – yerləşmək, qüvvə, qüdrət. [iv] Carubkəşi-dərgahi-canan – Canan qapısının süpürgəçisi.
|