Boyun sərvi-səhi, zülfün müənbər,[i]

Cəmalın Yusifi-Kənanə bənzər.

Qaşın aşiqlərin qəsdinə guya,

Xəm[ii] olmuş tiqi-sərəfşanə[iii] bənzər.

Açanda gözlərin alır bu canı,

Yatanda fitneyi-dövranə bənzər.

Baxanda naz ilə tiri-nigahın,

Könüldə xəncəri-bürranə bənzər.

Dilin bülbül, saçın sünbül, üzün gül,

Kəc olmuş kirpiyin peykanə bənzər.

Məhi-rüxsarin, ey huri-behişti,

Gülüstanda güli-xəndanə bənzər.

Vurub badi-səba zülfün dağıtmış,

Gül üzrə dəsteyi-reyhanə bənzər.

Ləbi-ləli-şəfa-bəxşin, əzizim,

Be-eyneh[iv] çeşmeyi-heyvanə[v] bənzər.

Xalın hindu sifət günci-ləbində,

Oturmuş təxt əra sultanə bənzər.

Sənin kuyündə aşiqlər fəğani

Çəməndə bülbüli-xoşxanə bənzər.

Şərarəi-şurəngizindən,[vi] ey məh;

Sərim də atəşi-suzanə bənzər.

Gözüm yaşı fəraqindən üzümdə

Sərasər lölöi-qəltanə bənzər.

Əgərçi aşiqin çoxdur və lakin,

Inanma, heç biri Heyranə bənzər.