Mərhəba, etmiş tülu guya zəmindən, mahə bax!

Yüz min istiğna ilən olmuş rəvan, ol şahə bax!

Durdu yerdən şövq ilə, pişvaz üçün oldu rəvan,

Bildi ki, canan gəlir, sən bu dili-agahə bax!

Bəzm əra həmsöhbət olmuş, məndən ol dildarimə

Hər zaman bədguluq eylər, ol səki-bədxahə[i] bax!

Dilbərim, bari sən əğyar sözünə guş eyləmə,

Bu qədər zülm eyləmə, xof eylə, bir Allahə bax!

Düşməni-dun[ii] həmnişin, həmrahü həmdəm müddəi,

Həmnişinə seyr qıl, bir həmdəmü əmrahə bax!

Qorxmaz Allahdan o zalim, şərm[iii] qılmaz xəlqdən,

Oldu səddi-rəh bizə, ol kafəri-gümrahə[iv] bax!

Əqlimi aldı sərimdən, olmadı qane genə,

Istədi qanım tökə, mətlubu gör, dilxahə bax!

Ruzü şəb Heyran düagudur ona, leykən genə

Istəməz adın eşitsin, nifrətü ikrahə bax!