Üzün ey mah, qılar mehri-dirəxşan ilə[i] bəhs.

Zülfi-mişkinin edər sünbülü reyhan ilə bəhs.

Həddi yox ayü günün, sünbülü reyhanın, edə

Ol məhi-ariz ilə, zülfi-pərişan ilə bəhs.

Can alan qaşların, ol qanım içən qəmzələrin,

Eyləyər tiğ ilə, həm xəncəri-bürran[ii] ilə bəhs.

Gözlərin huşimi sərdən alıb ey afəti-can!

Edər ey şux ləbin ləli-dirəxşan ilə bəhs.

Qəddin ey mah, verib tubiyi-firdövsə[iii] şikəst,

Nə həmin eyliri bir sərvi-xuraman ilə bəhs.

Cəzbeyi-eşqin[iv] edib bənd, salıb zindanə,

Çün cəmalın elədi Yusifi-Kənan ilə bəhs.

Dərgəhində sənin, ey sərvəri-afaq, bu gün

Kimsənin həddi nədir, kim edə Heyran ilə bəhs.