Mən bir aşiqəm ki, bu çaldığım saz,

Dumanlı dağlara səs salacaqdır.

Ağlatdığım teldə inləyən avaz,

Elin xatirində çox qalacaqdır.

Doğrayacaq səsim dağda dumanı,

Dinləyəcək məni dağın çobanı.

Mən sorduğum zaman: "sevdiyim hanı?!"

Təbiət dəyişib yaz olacaqdır.

Qorxutmayır məni bu qanmayanlar,

İsrafil surundən oyanmayanlar.

Göstərdiyim yola inanmayanlar,

Yenilik yolunda ad alacaqdır.

Şahid gətirirəm ayı, ulduzu,

Ayılacaq yurdumun oğlu, qızı.

O yankı ellərin sartı, kırğızı,

Bu yeni dərgaha yol bulacaqdır.

1922-ci il