BALALARIMA
Aydın olsun gözləriniz! Gəldi bahar gülə-gülə. Gedən qışdan qalmaz bir iz: Gəldi bahar gülə-gülə, Oldu bahar gülə-gülə.
Çıxsın kəfəndən təbiət, Yaz yağışı böyük nemət. Qoy olsun Yer üzü cənnət Gəldi bahar gülə-gülə, Oldu bahar gülə-gülə.
Çal qış! Buyur, uğur olsun, Qır saçını cinlər yolsun. Gəl ay Durna, gəl, ay Dursun. Oldu bahar gülə-gülə, Gəldi bahar gülə-gülə.
Yaman günün ömrü azdır, Mövsümlərin gülü yazdır. Oldu bahar gülə-gülə, Gəldi bahar gülə-gülə.
Böyük dərddir vətən dərdi, Bu qış sizə ağır gəldi. Gəlin, quşlar Yazdır indi. Oldu bahar gülə-gülə, Gəldi bahar gülə-gülə.
Toplayıb bir dəstə çiçək, Di gəlin məktəbə gedək. Tənbəlliyə lənət edək. Oldu bahar gülə-gülə, Gəldi bahar gülə-gülə.
1917
|
© 2011 Ədəbiyyat portalı - www.azerlit.info