Nəvayi-həsrət
Əflakə çıxdı əbr-sifət dudi-ahımız, Ovci-fələkdə zülmətə qərq oldu mahımız. Bu ahi-tirə çeşmeyi-xurşidi qıldı tar, Parlarmı bir də kövkəbi-bəxti-siyahımız. Daldı qüruba pərtovi-amal büsbütün Bu mətləbə üfüqdəki zülmət – küvahımız. Keçmişdə qəhrəmani-şücaətkən, haliya, Məğlubi-düşmən oldu müzəffər sipahımız. Bir tək piyadə fil ilə rux göstərən zaman Düşdü vəzir heyrətə, mat qaldı şahımız. Zillət-sərayi fəqridə qaldıq zəlil, xar, Yəğmayə getdi şövkətimiz, izzü cahimiz. Ruyi-səmanı çulğalayırkən səhabi-cövr Gəlməz zühurə bariqeyi-intibahımız. Təcdidi-hal cılız ikən, bax ki, bizlərin Vardır yenə bu məsələdə iştibahımız. İşbu cəzayə məhzəri-divani-əsrdə Məhkum qaldı, iştə cəhalət günahımız. Bir dövr də bu novilə gər keçsə, bisual Olluq təmam qəhri-təbiətlə payimal.
Mənafzadə Sabit. 6 iyun 1914. “Sədayi-həqq”, 20 iyul 1914
|