Həyat səhnəsinin cansız pərdələri
1 Məbhut qalır əqlim Gördükcə bu dünyanı. Ovzai təbiətdə Bilməm bu nə halətdir? Çıldırdım, aman, ya rəb! Həll et şü müəmmanı, Məcmueyi-xilqətdə, Aya, bu nə hikmətdir? 2 Afaq edər hər dəm Bir əksi-əməl izhar. Məşriqdə doğar zülmət, Məğribdə günəş parlar. Bu hadisələr, əlhəqq, Şayisteyi-heyrətdir. Məcmueyi-xilqətdə, Aya, bu nə hikmətdir? 3 Məzlumu əsir etmək — Zalimlərin amalı. Züllamı düşündürməz Məzlumlərin halı, Min cövr ilə bir məzlum Məhkumi-əsarətdir, Məcmueyi-xilqətdə, Aya, bu nə hikmətdir? 4 Bu fəsl müsəlləmdir Qanuni-təbiətdə. Rahət yaşayır zəngin Məmureyi-izzətdə. Viranədə bir miskin Möhtaci-şəfəqqətdir. Məcmueyi-xilqətdə, Aya, bu nə hikmətdir? 5 Əyyami-bahar olcaq Gülşəndə açar güllər. Güllər gülərək, ağlar Min şurilə bülbüllər. Bülbül qəmə aludə, Gül valehi-işrətdir. Məcmueyi-xilqətdə, Aya, bu nə hikmətdir? 6 Məşuqədə yüz qəmzə, Üşşaqidə min nalə. Biganə qalır aşiq Gülçöhreyi-amalə. Zindani-məhəbbətdə Pabəsteyi-möhnətdir, Məcmueyi-xilqətdə Aya, bu nə hikmətdir? 7 İllərcə bulur payan Cəhhali-fəna-fitrət. Mədfuni-məzaristan Bir gənci-düha fikrət. Gül cismi məzar içrə Həmxabeyi-həsrətdir. Məcmueyi-xilqətdə, Aya, bu nə hikmətdir? 8 Hər vəqəsi bu dəhrin Bir pərdeyi-hüznavər. Diqqətlə bax, al ibrət, Ey qarei-xoşmənzər. Hər sətri bu əşarın Bir qanlı həqiqətdir, Hər pərdəsi bir dürlü Ayineyi-ibrətdir...
Mənafzadə Sabit. Bakı, 13 iyun 1914 “İqbal”, 13 iyun 1914
|