Dəruni-cigərdən zəbani-hal
Ey fələk, yan! Şöleyi-ahilə yan, ol payimal, Ki, atəşi-hüznə yaxıb, zülmünlə yandırdın məni. Sərnigün ol, sərnigun, ey asimani-kəcmədar, Kim bütün hali-həyatımdan usandırdın məni. Günbəgün etdin əsiri-xun bu əhvalimi, Hüzn içində həp düçari-yəs qıldın halimi. Yaxşı yapdın, məhrəba, təqdiri-izmehlalimi. Zənn edərkən zövqilə mənzilgəhi-amalımı Tusəni-iqbalımı çəkdin, dayandırdın məni. Büsbütün hali-həyatımdan usandırdın məni.
Ey sipehri-gəcrəviş, ey kami-cövrü mələnət, Qoyma düşsün boş yerə afaqi sovti-mədilət. Kim deyir dünyadə var qanun, ədalət, mərhəmət, Pərtovi-iqbaldən zurü sitəmlə bicəhət, Sayeyi-idbarə çəkdin daldalandırdın məni, Büsbütün hali-həyatımdan usandırdın məni?
Mən deyirdim bəs cahan ədl ilə dolmuş bisual, Mədəniyyət abad edər dünya üzün cənnət-misal, Xatirimdən zərrəcə keçməzdi bu ovzai-hal, İndi qandım səhv imiş onlar, bütün boş bir xəyal, Mərhəba tədbirinə, çox yaxşı qandırdın məni, Büsbütün hali-həyatımdan usandırdın məni.
Puç olub, yan, ey fələk, ey mənbəyi-cövrü fəsad, Bundan artıq tapmasın ta dövri-zülmün imtidad. Gör nə yüksəlmiş sənə məzlumlərdən ahü dad Neyləmişdim, söylə bir, ey asimani-bədnəhad, Kim əsiri-diləfkar etdin, alovlandırdın məni, Büsbütün hali-həyatımdan usandırdın məni,
M. Ə. Mənafzadə - Bakı, 23 mart. “Sədayi-həqq” ** 66, 25 mart 1913
|