Çarşaflı-çarşaflı
Qadınlar şöbəsində rəhbərəm, çarşaflı-çarşaflı, Bütün nisvani azad istərəm, çarşaflı-çarşaflı.
Məni sətr eyləyən çarşaflar əsbabi-vüqarımdır, Əvamülnas içində hörmətimdir, etibarımdır. Anamdan qalma irsim, həp müqəddəs yadigarımdır, Işıq ömrə qaranlıqlar saçan müzlim məzarımdır, Həyati seyr edən bir məqbərəm, çarşaflı-çarşaflı, Bütün nisvani azad istərəm, çarşaflı-çarşaflı.
Həya-hörmət yolun anlarımı heç azadə bir düxtər? Qadınlıq ismət istər, abi-ru istər, həya istər, Vəli çarşafsız ismət, abi-ru mümkünmüdür, göstər, Açıq türk arvadı, yəni: adam şəklində bir əntər. Fəqət mən məhliqa bir dilbərəm, çarşaflı-çarşaflı, Bütün nisvani azad istərəm, çarşaflı-çarşaflı.
Əgərçi günbəgün qanuni-hürriyyət olub məcra, Kulublarda açıq iclas edir nisvan bəzmara. Fəqət mən əskidən bir başqa ruhə olmuşam dara, Açıqlıq məsləkin tərvic etmərəm, zira, Müdiri-xasi-Molla Qənbərəm, çarşaflı-çarşaflı, Bütün nisvani azad istərəm, çarşaflı-çarşaflı.
O gün şeyxin gözəl vəzindən aldım həzzi-ruhani, Buyurdu: tanrımız əvvəlcə xəlq etdikdə insanı Şü erkəklərə naməhrəm yaratmış cinsi nisvanı, Xüsusən, bir də məhkumi-hicab etmiş müsəlmanı. O gündən xakbusi-mənbərəm, çarşaflı-çarşaflı, Özüm də məhliqa bir dilbərəm, çarşaflı-çarşaflı.
Dastançı “Molla Nəsrəddin” â„– 19, 9 may 1925
|