Vətənim
Mənə bir madəri-şəfqət Vətənimdir, Vətənim, Mənə ağuşi-məhəbbət Vətənimdir, Vətənim. Mənə bir sevgili cənnət Vətənimdir, Vətənim, Mənə məvayi-səadət Vətənimdir, Vətənim. Mənə sərmayeyi-izzət Vətənimdir, Vətənim, Məzhəri-paki-təbiət Vətənimdir, Vətənim.
Vətənin fikridir əfkarimi tənvir qılan, Nəşeyi-eşqi bütün ruhimə təsir qılan, Boynuma reşteyi-amalımı zəncir qılan, Mənə hübbül-vətən adabını təfsir qılan, Dinü imandan ibarət Vətənimdir, Vətənim. Mənə məvayi-səadət Vətənimdir, Vətənim.
Zahida! Sən hələ get şeyxi-riyakarə yapış, Aşiqa! Sən də fəqət daməni-dildarə yapış. Şövqi-vüsətlə səri-silsileyi-yarə yapış, Mənə kaşaneyi-vüslət Vətənimdir, Vətənim, Mənə məvayi-səadət Vətənimdir, Vətənim.
Qüsseyi-firqəti-madər məni naşad elədi, Qəmi-hicrani Vətən könlümü bərbad elədi, Gülşəni-şeiridə təbim quşu fəryad elədi, Mürşidi-hüsnü məni məsləkə irşad elədi. Fəzli-övlayi-təriqət Vətənimdir, Vətənim, Mənə məvayi-səadət Vətənimdir, Vətənim.
Vətən amalıdır insanə verən zövqi-həyat, Həp bu zövqilə mühəyya bulur əsbabi-nicat, Sərnəviştimdə yazılmış mənim üşbu kəlamət: Sabita! Xidmət üçün qıl Vətən uğrunda səbat. Degilən layiqi-xidmət vətənimdir, Vətənim. Məzhəri-paki-təbiət Vətənimdir, Vətənim.
“Sədayi-Vətən” 13 aprel 1913 Mənafzadə Sabit
|