Fəsli-bahar gəldi, könül, şad kam bul
Fəsli-bahar gəldi, könül, şad kam bul,
Yox etibar gərdişi-əyyamə, cam bul.
Naseh haram deyərsə meyi, söylə sən ona:
Mən püxtə olmuşam, get özün kimi xam bul.
Bir neçə yarü həmdəm ilə künci-bağdə,
Vəqti keçirmə, badeyi-gülnar-fam bul.
Eylə sücud sidq ilə əbruyi-saqiyə,
Ol sərvqamətin nəzərində qiyam bul,
Yoxdur davamı zahidi-xuddar lütfünün,
Tap bir pərivü rahəti-eyşi-müdam bul.
Vaiz kəlamə baxmasa bilməz nədir cəvab,
Oldur cəvab: mürşidi-hafizkəlam bul.
Zinhar girmə məscidə, bihörmət olmagil,
Var, paytəxti-meykədəyə, ehtiram bul.
Həq söz budur ki, mədrəsədir dari-qalü qil,
Qovğayə salma kəndini, Darüssəlam bul,
Eşq əhli getdi hər biri bir ismü rəsmlə,
Zakir, oturma sən dəxi bir niknam bul.