Ləbin şərabından məst olan aşiq
Ləbin şərabından məst olan aşiq,
İnanma, sarərü səhbayə baxar.
Rüxsari-alının həsrətin çəkən
Nə günə göz açar, nə ayə baxar.
Rövnəqi pozulub otağımızın,
Ziyası qalmayıb çırağımızın;
Nəkhəti-zülfündən dimağımızın
Müəttər olmarı səbayə baxar.
Əvvəl aldın əqlü huşü kəmalım,
Quru nəfəs qalıb, əyandı halım.
Dəxi nə istərsən, bimürvət, zalım,
Şah olan əhvali-gədayə baxar.
Səngdil sənəmin nə binası var,
Deməz aşiqimdi, müddəası var,
Cəfanın da həddi, intəhası var,
Bəndeyi-xuda bir xudayə baxar.
Eşq ucundan oldum günü qarə mən,
Dönə-dönə yandım alovlarə mən.
Zakir deyər, nedim o nigarə mən,
Nə dadə, nə ahü sədayə baxar?