Dilbər, səni tarı, günəş camalın
Dilbər, səni tarı, günəş camalın,
At bürqəni, al yanağı görünsün.
Bəyaz cəbinində qövsi-qüzeh tək,
Hərami qaşların tağı görünsün.
Gizləmə gəncini süni-xudanın,
Qoy olsun aşikar, sən ol öz canın;
Sal ağızdan yamşaq, şəkər dəhanın
Şirin-şirin danışmağı görünsün.
Susayıb qanıma bimar gözlərin,
Xəstədir, gördüyün umar gözlərin,
Eşq əhlinə iki xumar kgzlərin .
Kaman çəkib, ox atmağı görünsün.
Çəkibsən sədrinə qara çarqatı,
Bulud kimi alan ara çarqatı.
Götür, tulla bir kənara çarqatı,
Giribandan sinən ağı görünsün.
Sevgi gərək ola sevgisilə düz,
Əylənə bir yerdə gecəvü gündüz;
Bir dəm Zakir ilə otur üzbəüz,
Üzarının solu, sağı görünsün.