Dün düşdü güzarım yarın kuyinə,
Dərdü ğəm çevrəsin alıbdı, gördüm.
Soruşdum əhvalın, cavab vermədi,
Gözləri yaş ilə dolubdu, gördüm.

Ahü zar çəkməkdən yox olub varı,
Ayinəsin tutmuş möhnət rubarı.
Əyyami-xəzana dönüb baharı,
Saralıb gül rəngi solubdu gördüm.

Kamana dönübdü qaməti-mövzun,
Əhvalını fələk edib digərgun.
Gecə-gündüz ağlamaqdan əşki-xun
Almas kiprikləri yolubdu gördüm.

Hanı mən gördüyüm əhmər yanaqlar,
Müsəlsəl keysulər, nəsrin buxaqlar?
Təravətdən düşüb ğönçə dodaqlar,
Deyib-danışmaqdan qalıbdı, gördüm.

Zakir, xərab olsun belə zəmanə,
Həmişə yaxşılıq verib yamanə,
Yar ilə qolboyun gəzdiyim xanə
Dağılıbdı, bərbad olubdu, gördüm.