Dərdbilməzlər qınar məni, heç deməz
Dərd ilən doludur döşüm, ağlaram.
Çərxin sitəmindən, dövrün zülmündən
Tökülür dəmbədəm yaşım, ağlaram.

Nə qədər könlümə verrəm nəsihət,
Bir zaman eşqdən olmaz fərağət;
Nə onda mürvət var, nə məndə taqət,
Yaman yerə yetib işim, ağlaram.

Hər kimsənin olsa bir xeyrü şəri,
Gəlib məndən alır idi xəbəri;
O qaşları yayı görəndən bəri
Dağılıbdır əqlü huşum, ağlaram.

Diyari-ğürbətdə binamü nişan
Qalmışam, tapılmaz halım soruşan;
Nə bir gələn, nə bir əhval danışan;
Yollardadı gözüm, kuşum, ağlaram.

Düşəndə yadıma vəfalı dilbər
Sərasər od tutub alışır cigər.
Ğəm tünlük, mən yalqız, yüz yana çəkər,
Zakirəm, böyüyüb başım, ağlaram.